Refnan di koral salú tin mester di un ambiente pober na nutrishon. Limanan, ku por pèsta i stek e koralnan, ta krese bon hustamente ora tin hopi sustansia nutritivo den awa di laman. E kapa di koral di nos refnan a baha drástikamente e último desena di añanan. P’esei e kantidat di piská ta baha tambe. Si nos sigui asina, e sistema ekológiko ta derumbá.

E koralnan ta bou di preshon tambe pa otro motibunan. Kambio di klima ta un ehèmpel. Pa motibu di un temperatura mas haltu di e awa di laman ta surgi “coral bleaching”. Si esei dura sufisiente largu, koralnan afektá por muri.
Oséanonan ta apsorbé mas i mas dióksido di karbon (CO2) ku aktividatnan humano ta pone den aire. Den e awa di laman e dióksido di karbon ta ser transformá den ásido karbóniko. Asina e oséanonan ta asidifiká. Awa di laman mas zür tin un influensia negativo riba koralnan ku pa gran parti ta konsistí di kalki.

Dor di influensia di yobida i bientu riba suela (eroshon) partinan chikitu di e suela (sedimento) por bai den awa di laman. Esaki ta hasi e awa trubel i ta sòru tambe pa suministro di nutrientenan. Esaki ta sosodé partikularmente den áreanan ku konstrukshon. Pero koralnan mester di hustamente lus di solo pa krese i ta gusta un ambiente ku ta pober na nutrishon.

Dor di tur e influensianan akí e koralnan ta sufri i p’esei nan ta bira malu mas fásil. Nos no por hasi muchu kos na kambio di klima i malesanan di koral. Pero si nos por purifiká nos awa sushi riba nos isla i sòru ku eroshon i sedimentashon ta bira ménos.

Awa sushi no ta solamente dañino pa salú di nos refnan di koral, pero tambe pa nos propio salú. E por kousa malesanan. Nos sa ku e awa di suela kantu di e zona kostal ta kontaminá ku nutriente- i bakterianan. Pero den laman tambe kresementu di bakterianan dañino ta oumentando. Esei por forma un peliger pa salubridat públiko.

Finansiamentu
P’esei nos ta trata nos awa sushi den instalashonnan di purifikashon di awa sushi. Union oropeo a paga pa e instalashon di purifikashon i e sistema di kloaka. Hulanda a paga pa e mas di mil konekshonnan di bibienda- i negoshinan riba e kloaka. Pero e ta keda un proyekto boneriano. Entidat públiko Boneiru ta e benefisiario i tambe esun responsabel.

E proyekto di kloaka pues ta un regalo ku un balor total di mas di 40 mion dòler. Pero maske ku ta di regalo bo a haña un outo, tòg ta abo mes mester paga seguro i gasolin. Esei ta e kaso tambe ku e kloaka. Nos mes mester paga pa un parti di e gastunan di purifikashon di e awa sushi i mantenshon na e instalashonnan. E repartishon di e gastunan riba henter komunidat ta opvio, pasobra ta nos tur ta probechá di e bentahanan ekonómiko di awa limpi i un isla limpi.

Konekshon obligatorio
Tur kas di famia i negoshi den e área di kloaka ta legalmente obligá pa konektá. E área di kloaka ta keda banda di e área kostal for di Hato kantu di Playa Pabou i Playa Pariba te den besindario di aeropuerto i di Belnem te Punt Vierkant.

Awa shinishi

Den e área di kloaka mester deshasí di awa pretu, esta e awa ku ta sali for di tualèt, den e sistema di kloaka. Awa shinishi, esta e awa residual doméstiko di ducha, wastafel, kushina i wasmashin, bo por usa pa muha matanan den hardin. Esaki sinembargo no ta konta pa hotèlnan, komplehonan di apartamentonan i otro negoshinan. Nan mester deshasí di nan awa shinishi tambe den e kloaka.

Uso di nobo di awa purifiká
E proyekto di kloaka ta duna awa purifiká ku por ser usá di nobo den hardinnan di hotèlnan i pa agrikultura i hortikultura. Asina turistanan por gosa di mata i flornan tropikal. I kunukeronan i hardineronan tin henter ora awa di irigashon na nan disposishon, tambe den e temporada di sekura.

Tin reglanan estrikto pa awa pa irigashon i su uso. Asina gobièrnu ta pone eksigensianan di kalidat estrikto pa awa sushi purifiká i tin reglanan rígido pa uso di awa pa irigashon. Ademas tin stipulashonnan pa uso di awa pa irigashon pa kultivá bèrdura i fruta i pa irigá espasionan bèrdè. Personanan privá no ta bin na remarke pa suministro di awa pa irigashon.

Promedio nos ta risibí mas di dies mil turista di estadia pa luna riba nos isla. Nan tur huntu ta gasta pa aña mas di 160 mion na estadia, kuminda i bebida. Pero nan ta gasta hopi plajka tambe na deportenan akuátiko, manera snòrkel, windsurf i kitesurf. Un parke marina ku awa di laman kontaminá i sin koral òf piská naturalmente no ta atraktivo.

Si bin ménos turista di estadia òf sin nan keda sin bin ètòl, nos ta sinti esei den nos pòtmòni. Segun kalkulashon, ochenta porshento di e kuponan di trabou riba nos isla ta mará direkto òf indirekto na turismo. Nos ekonomia ta stèns riba turismo i nos turismo ta dependé di naturalesa. Ku esei naturalesa, partikularmente nos parke marina, ta nos fuente mas grandi di ingreso.