Kuminsá e aña aki bon i yuda nos mondi

Kralendijk, 18 di yanüari 2017 – Yuda na momentu di planta un mondi ta un bon manera pa kuminsá e aña nobo aki. Riba djasabra 21 di yanüari Echo ta organisá e último dia di planta palu pa e temporada di awaseru aki. No solamente bo ta yuda nos mondi, pero bo mes ta den kontakto intensivo ku naturalesa atrobe. Partisipá bo tambe!

E evento aki ta dirigí su mes riba plantashon di por lo menos 400 palu den Parke Nashonal Washington Slagbaai riba djasabra 21 di yanüari for di 8’or di mainta te 12’or di mèrdia. Echo ta sòru pa transporte for di entrada di e parke. Tambe tin kos di bebe i kos di kome disponibel. Bin ku bon sapatu, bòter di awa i krema kontra kimá di solo. Bo por bini tambe ku hèrmènt pa traha den kurá i hantskun si bo tin!

Ku e último plantashon aki nos ta alkansá nos meta di 2000 palu nobo plantá den Parke Washington Slagbaai. E aktividat aki ta parti di un proyekto di reforestashon kaminda Echo lo planta en total 20.000 palu riba nos isla riba enkargo di Entidat Públiko Boneiru. STINAPA ta sostené e proyekto i e asina yamá Fondo di Naturalesa di reino ta sòru pa e finansiamentu. Mas palu i un diversidat mas grandi di palu ta mihó pa nos bestianan, nos suela, nos klima i nos hendenan, naturalmente!

Organisashon- i empresanan ku kier yuda hasi Boneiru mas bèrdè ainda por tuma kontakto ku Quirijn Coolen (quirijn@echobonaire.org òf 785-4128) òf Edshel Martha (edshelmartha@hotmail.com òf 796 -2534).

Pa mas informashon: www.facebook.com/Nos-ta-biba-di-naturalesa-

www.facebook.com/echobonaire.org

[Teksto pa bou di e potrèt: Trahadónan di Digicel ta demostrá ku planta palu ta hopi dibertido i ku e por tuma lugá yen di stail.]