Siglonan pasá a kap tur mondi di Boneiru. E isla nunka mas a rekuperá di e sla aki. Kabritu, porko i buriku ku ta kana liber ta keda sòru pa problema pa motibu ku nan ta kome mata i palunan chikitu. Hende tambe tin bes innesesariamente ta hasi terenonan limpi limpi. Esaki ta sòru pa eroshon komo ku no tin vegetashon mas pa wanta e suela. Áwaseru i bientu ta bai ku partíkulanan di suela ku finalmente ta resultá den laman.

Ta bin aserka ku pa motibu di kresementu di e poblashon tin mas konstrukshon i ta solidifiká mas superfisie. Esaki ta pone ku áwaseru no por sak mas den suela i ta kore bai laman. Nos por kolektá e awa akí den dam i saliña. Di e forma ei nos ta protehá nos refnan di koral. E reservanan di awa ta atraé paranan di awa, entre nan nos ‘para nashonal’ flamingo.

Tambe sakamentu di mineral ta kousa eroshon. E ta destruí habitat di mata i bestia i bientu i awa ta haña kaminda liber. E konsekuensia ta eroshon. Rekuperashon di naturalesa den e burakunan di greis bandoná ta posibel.

Pa rehabilitashon di nos naturalesa, mantenshon di nos refnan di koral i hasi nos agrikultura mas duradero ta nesesario pa tene kabritu será den kurá. E ora ei vegetashon por rekuperá i eroshon por bira ménos.

Un kondishon importante pa agrikultura i krio di bestia bira duradero ta dor di pone awa di bebe i di irigashon disponibel. Pa esaki posnan públiko ta indispensabel. Den pasado gobièrnu a laga traha alrededor di bintisinku pos di awa ku molina di bientu. E kunukeronan ta usa e awa di pos pa propio uso, pa nan bestianan òf pa kultivashon di berdura i fruta. Na e momentunan akí un parti di e molinanan di bientu i tankinan di awa ta den kondishon asina deplorabel, ku no por usa nan. E proyekto ta enserá ku ta bai rehabilitá mas òf ménos diessinku pos di awa i molina di bientu.

Damnan ta tene awa di yobe i ta protehá zonanan residensial kontra molèster di awa. E damnan tin un funshon importante tambe pa protekshon di e refnan di koral. Nan ta kapta partíkulanan di suela ku e awa di yobe ta lastra bai kuné. E awa di yobe ku kolektá ta importante pa kunukeronan tambe, pa nan bestianan i pa kultivashon di bèrdura. A traha un parti di e damnan pegá ku posnan di awa, di manera ku awa di suela ta haña awa dushi aserka.
Hopi dam a sera ku lima i ku vegetashon. Esaki ta pone ku e kapasidat pa tene awa ta disminuí. Mas abou den e roi esaki ta sòru pa molèster di awa den barionan residensial i fluho èkstra di sedimento ku ta bai laman. Tampoko a mantené diferente saliña, manera Saliña di Vlijt i Saliña Onima ku pa e motibu ei a sera ku lima. Pa e motibu ei nan no ta tene e partíkulanan di suela ku bolbe trese i nan ta kore bai laman. Den e proyekto ta rehabilitá mas òf ménos diessinku dam i dos saliña.

Tin mas di trinta buraku di greis bandoná ku a keda drumí manera heridanan habrí den e paisahe. Un kantidat di e burakunan bandoná ta fungi komo lèntfel ilegal. Esaki ta un riesgo grandi pa salubridat públiko i ambiente di bida. Dor di kolektá e awa di yobe den burakunan di greis bandoná, nan lo por haña un funshon di reserva di awa i por organisá nan komo zona di naturalesa pa flora i founa.

Rekuperashon ekológiko di e sistema di awa lokal i burakunan di greis ta hasi e paisahe mas atraktivo pa turista i rekreante lokal.

Pa dam, saliña i pos di awa tin plannan di mantenshon formulá, di manera ku gobièrnu por inkorporá e trabounan nesesario den e plannan anual i presupuestonan.