Mihó fasilidat di tira sushi pa bishitante di nos playanan

Kralendijk, 16 mart 2017. Entidat Públiko Boneiru na e momentunan aki ta laga basha fundeshi di betòn pa baki di sushi nobo na algun playa popular. Ku e proyekto aki gobièrnu ta sòru pa mihó servisio i playanan mas limpi. 

E fasilidatnan nobo ta bini na lugá di e bakinan di sushi ku no ta sirbi mas. Tambe e kantidat di bakinan di sushi ta bira hopi mas grandi, di manera ku semper tin unu na alkanse di tur hende. E fasilidatnan ta bini na Te Amo Beach, Playa Pal’i Mangel (Donkey Beach), Playa Fòrn’i Kalki (Bachelors Beach), na e playa kaminda ta praktiká ‘kitesurfing’ Atlantis, Sorobon, Punta Kalbas i Lac Cai. E fasilidatnan ta konsistí di algun muraya ku ta duna espasio na 2 te 4 kònteiner di sushi. E sistema aki ta sòru ku e kònteinernan no por bòltu. A diseñá e fasilidatnan di tira sushi den konsulta ku Selibon, ku regularmente lo hasi e bakinan bashí. Na algun sitio ta bini baki di metal pa sobrá di karbon di barbekiú. Karbon por ta kousa di polushon di playa i ta malu pa bida bou di laman.

E proyekto ta un kontinuashon di akshonnan di limpiesa anterior i medidanan di protekshon pa turtuga. E ehekushon di e aktividatnan ta na enkargo di Entidat Públiko Boneiru i e finansiamentu ta bini di e asina yamá fondonan di naturalesa di reino.    

Portret: Fundeshi pa baki di sushi na Playa Pal’i Mangel