Destrukshon na proyektonan di gobièrnu

Kralendijk, 5 di yüli 2017 – Ladronisia i destrukshon ta stroba ehekushon di diferente proyekto di naturalesa di Entidat Públiko Boneiru. Na fin di aña pasá i den e lunanan ku ta tras di lomba deskonosínan na diferente okashon a kometé destrukshon. Entidat Públiko a hasi denunsia na polis.

Entidat Públiko Boneiru ta dunadó di enkargo pa mas ku 10 diferente proyekto ku ta dirigí riba uso sostenibel di naturalesa i mehorashon di e koherensia entre naturalesa i turismo. Organisashonnan lokal ta ehekutá e proyektonan. Ehèmpel di esaki ta e bòrchinan di atvertensia pa protehá e áreanan kaminda turtuga ta pone webu a lo largo di e kosta na e parti sùitwèst di nos isla. Den e kuadro di proyektonan di naturalesa a traha diferente ruta turístiko pa outomobilista, siklista i hende na pia. Mas aleu gobièrnu ke planta en total 20.000 palu endémiko nobo na 10 diferente sitio.

Lamentabelmente na diferente lugá vandalistanan a kibra e bòrchinan di atvertensia i e bòrchinan ku ta indiká ruta. Riba Seru Largu no mas ku tres biaha nan a kòrta i hòrta e waya di un kurá. E kurá aki ta destiná pa tene kabritu i buriku pafó di un área di reforestashon. E área ta keda aksesibel pa hende si. Entidat Públiko Boneiru a hasi denunsia na polis di e destrukshon i ladronisia di pertenensianan di komunidat. Awor ta kontrolá mas riguroso, tantu den dia komo anochi. Gobièrnu di Boneiru ta hasi un yamada na tur suidadano pa ta alerto riba destrukshon i ladronisia i pa mèldu esaki imediatamente na outoridatnan.       

Mas informashon: Facebook@NTBDN