Reforestashon na Fontein
Kralendijk, 19 di yüli 2017. Entidat Públiko Boneiru a indiká un tereno banda di Kaminda Onima na altura di Fòntein pa reforestashon. Esaki ta un di e 10 áreanan ku ta destiná pa e meta aki. Awor Fundashon Echo ta bai hasi e preparashonnan pa por kuminsá ku plantamentu di palu den temporada di awaseru.
E sitio nobo ta un tereno kaminda den pasado e servisio di Agrikultura, Krio di Bestia i Peskeria (LVV) a hasi prueba ku plantamentu di tiponan di yerba ku ta hopi resistente kontra sekura. Awendia nan ta planta sierto kultivo pa sirbi komo kuminda di bestia riba e tereno di LVV na Kaminda Lagun usando awa purifiká prosedente di e instalashon di purifiká awa di kloaka. Fundashon Echo ta kuminsá ku drechamentu di e kurá pa tene kabritu, buriku i porko pafó. Entidat Públiko Boneiru a duna enkargo pa e proyekto, ku e asina yamá fondo di naturalesa di Reino ta finansiá.
Pa motibu ku Boneiru su klima ta kayente i seku i su suela ta duru e desaroyo natural di nos matanan hopi biaha ta bai pokopoko. Proyektonan di reforestashon por duna naturalesa un man. Mas palu ta nifiká ku e raisnan por tene e suela mas mihó ora awaseru kai duru. E blachinan ku ta kai for di palu ta yuda krea un suela fértil i ta sòru pa e tera por apsorbá mas awa di manera ku e palunan por krese mihó. Palu ta saka stòf for di den aire tambe. Mas aleu palu ta importante pasobra nan ta ofresé nos sombra. Banda di esei nan ta ofresé luga di biba i kuminda na nos bestianan. E área ta keda aksesibel pa públiko.
Pa mas informashon:
