Parke di kueba i ‘karst’ di Boneiru
Pakiko?
E kueba- i karstnan riba nos isla ta bou di menasa pa motibu di: Hendenan ku ta bishita kuebanan deskontrolá; polushon; habitat di ratonnan di anochi ku ta bai pèrdí; espesienan di animal i mata ku no ta pertenesé aki.
Karst ta un nòmber kolektivo pa fenómenonan kaminda piedra di kalki (koral fosil) ta disolvé pa motibu di ásido di karbon (CO2) den awa di yobe.
Impakto riba klima i naturalesa
Ratonnan di anochi ta e úniko mamíferonan nativo riba nos isla. Mayoria espesie di raton di anochi na Boneiru ta bou di menasa serio. Mas òf ménos mitar di e espesienan di raton di anochi ku ta biba aki ta dependé di kueba. Boneiru konosé dos espesie di raton di anochi ku ta biba di nèktar, un líkido dushi prosedente di flornan di yatu: raton di anochi lenga largu (Glossophaga longirostris) i raton di anochi snùit largu (Leptonycteris curasoae). E ratonnan di anochi akí ta polinisá flor di yatu i pèrkurá asina pa kadushinan karga fruta. I e frutanan ei na nan turno ta forma kuminda pa masha hopi otro animal, manera para i reptil.
Den kuebanan tin tambe ratonnan di anochi ku ta kome insekto: raton di anochi nanishi suave (Myotis nesopolus), raton di anochi orea di trèktu (Natalus tumiridostris) i (Mormoops megalophylla intermedia Miller).
Den kuebanan ta biba otro animal tambe, manera kabaron i piská chikitu.
Impakto sosial
Tur tempu kaba kuebanan a hunga un papel importante den historia i kultura di komunidatnan. Esaki ta konta tambe pa e kuebanan na Boneiru. E antiguo pinturanan den baranka den diferente kueba ta testigunan di esaki. Nan ta pertenesé na e patrimonio históriko di e isla.
E proyekto “Parke di kueba i karst Boneiru” ta resultá den un parke di naturalesa úniko riba i bou di tera den e área di Barkadera. E parke nobo lo enserá dies te diessinku kueba ku ta konektá ku otro pa medio di kamindanan pa kana. Den algun kueba por snòrkel tambe. Wildconscience, esun ku a tuma e inisiativa pa e proyekto akí, lo saka tur sushi for di e área. Pa taha kabritu-, buriku- i porkonan salbahe, lo sera e parke ku trankera. Naturalmente e área ta keda aksesibel si pa públiko. Huntu ku fundashon Echo Bonaire, ku ta ehekutá e proyekto di reforestashon, lo restorá naturalesa dor di planta palu i mata nativo.
Impakto ekonómiko
Kuebanan tin un balor ekonómiko tambe, partikularmente pa e industria di turismo. Hopi operadó di tour ya kaba ta ofresé ekskurshonnan di kueba. Parke di Kueba i Karst Boneiru lo bira un atrakshon nobo pa turistanan di naturalesa ku ta bishitá Boneiru. Esaki ta nifiká ku banda di guianan di buseo ta surgi empleo pa guianan di kueba sertifiká tambe. Dos bes pa aña lo ofresé kursonan pa bira guia di ekskurshon.
Kiko abo por hasi?
Bishitantenan di kuebanan na Boneiru mester tene nan mes na e siguiente reglanan general di kondukta:
1.No ta hasi daño na e kuebanan, e pinturanan di kueba prekolombino i formashonnan di kueba, manera stalaktita i stalakmita.
E pinturanan den baranka ta sentenáres di aña bieu, e formashonnan di kueba ta desena di míles di aña bieu. Sinembargo por kousa daño masha lihé mes na e balornan úniko akí di kuebanan. P’esei ta importante pa drenta kuebanan kouteloso i respetá nan balornan.
2. No ta stroba trankilidat di ratonnan di anochi i otro espesienan di animal den e kuebanan.
Kuebanan ta habitat di diferente espesie di animal, manera raton di anochi, kangreu, sòldachi i palabrua di misa. Partikularmente ratonnan di anochi ta masha sensibel pa estorbo, miéntras ku kuebanan ta esensial pa algun tipo di raton di anochi. Esaki ta nifiká ku nan lo no sobrebibí pafó di kueba. P’esei ta importante pa evitá mas tantu posibel ku ta stroba e espesienan akí di animal.
3. Den kuebanan ta papia solamente pokopoko. Grita, flùit, òf hasi bochincha di otro forma no ta permití.
Hasi bochincha òf grita no ta hasi daño solamente na e karakter típiko di un kueba, pero ta stroba e espesienan di animal presente tambe.
4. No ta saka ningun mata, baranka òf piedra dilanti i den e kuebanan. E kueba i su besindat direkto ta keda manera nan ta.
5. No ta pone nada permanente den e kueba i na nan murayanan, manera fèrf, kabel òf kabuya pa marka kaminda. Tampoko ta hasi daño na e murayanan, manera dor di raska òf grafiti.
6. Ta laga e kuebanan limpi atras, pues no ta laga sushi keda atras den nan.
7. No ta kome ni huma den e kuebanan.
