Riba djamars 10 di aprel e kampaña ‘Nos ta Biba di Naturalesa’ ta lansa un seri di programa di televishon tokante nos ambiente di biba i nos naturalesa. Den kada episodio un otro proyekto na Boneiru ta para sentral.
B-onair tv, e kanal nobo di televishon riba nos isla ta produsí e seri i ta transmiti’é tambe.
Julianka Clarenda ta presentá e programanan. Kada episodio ta konsistí di tres parti: mi mata òf palu preferí, tep di siman i un bishita na un organisashon ku ta ehekutá un proyekto. E promé episodio ta bai tokante reforestashon. E estreno ta djamars atardi 6’or i ta sigui ripití e episodio kada ora te 11’or djanochi. Seguidamente por wak e programa di nobo tur dia di siman. Un biaha den kada dos siman ta sali un episodio nobo. B-onair ta transmití riba kanal 61 di Telbo, online B-onair.com i YouTube channel B-onair.
Entidat Públiko Boneiru ta dunadó di enkargo pa e proyektonan tokante kua e seri ta bai. Den e ehekushon ta traha huntu ku vários organisashon lokal. E fondonan di naturalesa di Ministerio di Agrikultura, Naturalesa i Kalidat di Kuminda ta finansiá e proyekto- i aktividatnan.
E seri di televishon ta un suplemento riba e wèpsait www.bibadinaturalesa.com i e página di Facebook Nos ta biba di naturalesa.
