Sentro di Shushi Lagun i Sitio di Entregá Shushi Rincon
Pa tur produkto ta yega e tempu ku ta tira nan afó. Pa e motibu ei e seru di shushi ta krese. Ya nos lèntfel ta enormemente grandi kaba i no ta ofresé mas espasio pa mas shushi ainda.
Dikon?
Ademas shushi ta kontené supstansianan dañino ku ta afektá nos ambiente di biba. Si nos no ke pasa nos problema di shushi pa e generashonnan binidero, nos tin ku anda na un otro manera ku nos desperdisio. Shushi ta kontené tambe hopi material balioso ku nos por reusá. P’esei nos mester separá nos shushi. Glas por ehèmpel nos por mula hasi’é santu ku nos por reusá den konstrukshon di kas i kaminda.
Awendia nos tin tres sitio pa entregá shushi: na Playa (Kaya Indústria), na Rincon i na Sentro di Shushi Lagun. Na lugá di dùmp nos shushi riba un monton grandi, nos ta surti nos shushi sorto pa sorto einan. Asina e chèns pa reuso ta oumentá. Di e manera ei shushi a bira materia prima ku nos por traha produkto nobo kuné. Lesa e foyeto: ‘Shushi apart’.
Na Sentro di Shushi banda di un sitio pa entregá shushi ku espasionan pa surti shushi tin tambe un espasio ku aparatura pa prosesá shushi pa reuso. Por ehèmpel nos ta pèrs karton den bultu pa manda den eksterior kaminda un biaha mas nan ta traha karton kuné. Na Sentro di Shushi mas aleu tin tambe un instalashon pa kima shushi kaminda ta kima desperdisio médiko i loke ta sobra ora mata bestia.
Impakto riba klima i naturalesa
Ta un lástima pa e espasio i naturalesa riba nos isla chikitu aki pa sigui dùmp tur nos shushi riba un monton. Tambe t’asina ku nos shushi ta kontené supstansianan ku no ta deskompositá òf ku ta difísil pa deskompositá i tin ora ta keda eksistí pa sentenares di aña.
Impakto sosial
Shushi por ta un menasa pa salubridat públiko tambe. Muska i sangura por traspasá malesa. Pidapida plèstik chikitu i materianan peligroso por resultá den kadena alimentisio. Shushi riba kaya i dùmp ilegal ta mahoso pa bista. Shushi den espasio públiko no solamente ta mahoso i dañino pa nos komo habitante, e por influensiá turismo tambe negativamente.
Impakto ekonómiko
Habitantenan di nos isla i nos bishitantenan ta balorá un medio ambiente limpi. Sostenibilidat ta di gran importansia pa turista. E manera ku nos ta anda ku shushi tin influensia pues riba nos produkto turístiko, e pilá mas importante di nos ekonomia.
Banda di esei prevení ta mihó ku kura. Si aworaki nos anda kuidadosamente ku nos shushi, nos no tin mester di hasi gastu despues pa limpi’é.
Kiko abo por hasi?
- Semper tira bo shushi den e bakinan di shushi ku ta destiná pa esei.
- Mas tantu posibel apartá glas, karton, plèstik i bleki i entregá nan.
- Bo a limpia bo kurá òf den kas? Hiba tur shushi na un sitio di entregá shushi i entregá nan separá. Lesa e foyeto ‘Tene shushi apart’.
