Konsepto Programa di Medioambiente Boneiru

E Plan di Maneho di Shushi pa Boneiru ke yega na un situashon kaminda ta depositá ménos shushi posibel na Boneiru. Por hasi esei kolektando mas tantu shushi posibel separá i resiklá esaki. E ora ei lo depositá djis un parti chikitu di shushi ku a sobra ainda. Finalmente  Ehekutivo di Boneiru ke pone prosesamentu di shushi na e mes nivel ku munisipionan hulandes oropeo.

A realisá gran parti di ‘Masterplan Sewage and Sanitation System Bonaire’, mihó konosí  komo proyekto di kloaka. E kloaka i instalashonnan di purifikashon di awa ta nesesario pa protekshon di salubridat públiko, ref di koral i ekonomia. Union Oropeo i ministerio di Infrastruktura i Waterstaat a finansiá gran parti di e gastunan di invershon.

E kuadro legal pa maneho di medioambiente na Boneiru ta basá riba tratado, legislashon nashonal i legislashon lokal.

Tratado

• Protokòl LBS: Protokòl ‘Land Based Sources’, huntu ku Tratado di Cartagena pa prevení, redusí i kontrolá polushon di laman komo konsekuensia di aktividat na tera. A firma e tratado sí (1999), pero no a ratifik’é ainda.
• Tratado di Basel: Tratado tokante ehekushon i eliminashon di residuo peligroso. 
• Protokòl di Montreal: Protokòl huntu ku e Tratado pa protekshon di kapa di ozòn ku ta redusí uzo di produkto ku ta afektá kapa di ozòn.
• Tratado di klima di Nashonnan Uní: Tratado dirigí riba limitashon di kambio di klima.
• Agènda 2030 ku metanan pa un desaroyo sostenibel (Sustainable Development Goals; SDGs) di Nashonnan Uní.

Lei Nashonal

• Lei di bibienda popular,  planifikashon urbano i maneho di medio ambiente BES. E lei akí ta forma e kuadro legal pa maneho di medio ambiente na Boneiru, Sint Eustatius i Saba. Na 2012 e lei a drenta parsialmente na vigor. 

Lei lokal

• Ordenansa residuo Boneiru 
• Ordenansa awa shushi Boneiru 
• Dekreto konekshon di kloaka públiko Boneiru 
• Dekreto partisipashon pèrmit pa deshasí di sustansianan Boneiru
• Dekreto kobransa awa shushi Boneiru (den konsepto)
• Dekreto irigashon i fertilisashon Boneiru (den konsepto)
• Ordenansa di estorbo Boneiru 
• Dekreto molèster empresa di garashi Boneiru 

E Plan pa Maneho di Shushi Boneiru tin un seri di modelo di proyekto ku lo bai elaborá pokopoko den plan di proyekto. Entidat Públiko Boneiru a desaroyá e siguiente plannan di proyekto òf tin nan den desaroyo. Ministerio di Infrastruktura i Waterstaat ta pone ayudo finansiero disponibel pa esaki.

• Kima shushi (bio)médiko i shushi ku por kousa infekshon. Meta di e proyekto ta pa prevení riesgo pa salubridat públiko i ambiente di biba, kolektando shushi biomédiko, loke a sobra despues di mata bestia i kadaver di bestia pa kima.
• Sentro di shushi Lagun. Na e sitio pa depositá shushi na Lagun a krea un punto pa hiba shushi, pa siudadano- i kompanianan por entregá nan sushi separá. E Sentro di Shushi tin un espasio tambe kaminda ta surti i prosesá shushi. E instalashon pa kima shushi (bio)médiko tambe ta forma parti di e sentro di shushi.
• Lugá pa hiba shushi na Rincon. Ta sera e sitio pa depositá shushi na Morotin. Siudadano- i  empresanan na Rincon por entregá nan shushi separá na e punto pa hiba shushi. Despues Selibon ta hiba e shushi separá pa Sentro di Shushi Lagun.
• Terminashon di e sitio pa depositá sushi na Morotin Ta sera e sitio pa depositá sushi na Morotin. Ta hasi e sitio pa depositá shushi inaksesibel i ta tap’é ku tera. Seguidamente lo planta riba e anterior sitio di depositá shushi.
• Investigashon merkado di benta. Solamente un parti di e fluhonan di shushi ku nos kolektá separá nos por prosesá pa re-utilisá riba nos isla. Hopi biaha e volúmennan ta muchu chikitu pa por hasi esei ku ganashi òf e merkado di benta no ta sufisiente stabil. En general eksportá fluhonan di sushi ku nos a kolektá separá ku barku ta asina karu ku e benefisionan no ta òf apenas ta den ekilibrio ku e gastunan. Esaki ta forma un opstrukshon formal pa e maneho di shushi nobo. Tin nesesidat pa mas konosementu pa loke ta trata merkadonan di benta, gastunan di transporte i posibilidatnan di koperashon, tantu den nos region kom pafó di esei. Si resultá ku benta di materia prima no ta un opshon realístiko, eventualmente por konsiderá kimamentu di fluhonan di shushi.
• Kolektá shushi separá. Na Boneiru kolektamentu di shushi ta den man di Selibon N.V. ku Kolegio Ehekutivo a apuntá legalmente komo e úniko servisio pa kolektá sushi na nos isla. Otronan ku ke kolektá shushi mester tin pèrmit pa hasi esei. Esaki ta formulá den lei pa sòru ku ta eliminá shushi ta un manera efektivo i responsabel. Esaki ta nesesario pa protekshon di komunidat i ambiente di biba i na interes di desaroyo sosial ekonómiko.

  E struktura ku ta usa pa kolektá shushi separá ta dependé fuertemente di resultado di e investigashon di merkadonan di benta. Solamente tin sentido pa kolektá fluhonan di shushi separá si seguidamente di un òf otro manera por re-utilisá e shushi aki.

  Dentro di e struktura di kolektamentu nos por hasi distinkshon entre trese i buska. Ora ta trata di un sistema di trese, siudadano- i empresanan ta trese nan shushi separá na un sierto punto. Ora ta trata di un sistema di buska, Selibon ta buska e shushi na e fuente. Naturalmente sierto kombinashonnan di trese i buska tambe ta posibel. Tambe nos por hasi distinkshon entre separashon promé i separashon despues. Separashon promé ta tuma luga na e fuente i separashon despues ta tuma lugá na e Sentro di Shushi di Selibon. Esaki tambe por tuma lugá den sierto kombinashonnan.