Nos ta biba di naturalesa

‘Nos ta biba di naturalesa’ ta e lema di tur loke nos ta komuniká tokante ambiente di biba aden i naturalesa na Boneiru.

Ekonomia boneriano ta dependé pa un gran parti di e ambiente di biba i naturalesa. Nos ta un isla turístiko. Turista di tur parti na mundu ta bin disfrutá di solo, laman, trankilidat, espasio, eskala chikí i naturalesa ku Boneiru ta brinda.
Ku un shofùr di taksi ku ta transportá turista ta biba bon mirá di turismo ta klaro. Esei ta konta tambe pa empresario i personal di hotèl, restorant, skol pa sambuyá i otro empresa turístiko. Pero indirektamente tin muchu mas hende ta gana nan pan ku turismo. Un panadero no ta traha pan pa poblashon lokal so, pero pa turista tambe. Supermerkado,botika, banko, kontratista, personal di aeropuerto i hopi

hende mas ta benefisiá di turismo pues indirektamente di naturalesa boneriano tambe. Nos ekonomia ta basá pa un gran parti riba turismo i ku esaki riba naturalesa i eksperensia ku naturalesa ta brinda.

Nos ta biba pues di naturalesa. Nos avochinan tabata hasi esei tambe. Pero di un forma mas dirèkt. E promé bonerianonan tabata pinta baranka i esakinan na nan turno ta un atrakshon turístiko awor. E símbolonan di e logo ta inspirá riba e pinturanan den baranka akí. Solo, flamingo, piská i káktus ta simbolisá e kuater elementonan: kandela, aire, awa i tera. Hende ta pará sentral. Hende ta dependé di naturalesa. Pero hende tin infuensha tambe riba naturalesa. Nos ta biba di naturalesa, laga nos kuida e ambiente ku nos ta biba aden.

Organisashonnan enbolbí

Entidat Públiko Boneiru

Entidat Públiko Boneiru ta un ‘munisipio èkstraordinario’ di Hulanda. E gobièrnu ta komparabel ku gobièrnu di un munisipio. E organisashon públiko ta konsistí di kuater direktorado, inkluyendo e direktorado Planifikashon i Desaroyo.

STINAPAFundashon Parke Nashonal Boneiru

Fundashon Parke Nashonal Boneiru ta un organisashon no-gubernamental pa maneho di e dos parkenan nashonal protehá riba nos isla: Bonaire National Marine Park (BNMP) i Washingon Slagbaai National Park (WSNP). STINAPA Boneiru tin edukashon di naturalesa i medio ambiente komo un di su puntonan di lansa di mas importante. E edukashon aki ta stimulá muchanan na edat hoben kaba pa desaroyá un vínkulo ku naturalesa.

Selibon N.V.Rekohé shushi na Boneiru

Servisio di Limpiesa di Boneiru (Selibon) N.V. ta rekohé shushi na Boneiru. Pa tur bo preguntanan tokante shushi di kas, shushi gròf, shushi di empresa, impuesto riba shushi i lèntfel bo por tuma kontakto ku Selibon.

Kompania di Awa i Elektrisidat Boneiru (WEB)Suministro di awa i koriente

Na aña 1963 a lanta e Kompania di Awa i Elektrisidat Boneiru (WEB NV) i e ta propiedat di Entidat Públiko Boneiru. Komo kompania di utilidat WEB ta responsabel pa suministro duradero, konfiabel i pagabel di awa di bebe i koriente na mas ku 8800 kas di famia, empresa i organisashon na Boneiru. Riba tereno di prosesamentu di awa shushi tambe WEB ta aktivo.

E suministro di koriente i awa na Boneiru ta kontribuí na e desaroyo ekonómiko duradero di nos isla. Nos populashon ta oumentando, turismo ta desaroyando, Boneiru ta un merkado ku ta krese. Den e añanan benidero lo mester invertí hopi pa trese e konfiabilidat, aksesibilidat i kalidat di nos suministro di koriente i awa na e nivel ku ta pas serka e desaroyo rápido di Boneiru.

E tim di WEB ta konsistí di mas ku 120 trahadó. Nan ta traha huntu bou di e lema ‘Let’s do it together – Laga nos hasi’e huntu’, ku un noshon fuerte ku WEB ta di i pa e komunidat Boneriano.

Sea Turtle Conservation Bonaire (STCB)Protekshon di turtuga di laman

Sea Turtle Conservation Bonaire (STCB) ta un organisashon no-gubernamental ku desde 1991 ta protehá turtuga di laman na Boneiru. Na Boneiru ta eksistí tres di e seis tipo di turtuga di laman ku ta bou di menasa di ekstinshon: karèt, turtuga blanku i kawama.

Wayaká Avies (Konseho di Wayaká)Inisiá i implementá proyekto

E mishon di Wayaká Advies ta pa protehá i drecha medio ambiente i naturalesa di Boneiru dor di inisiá i implementá proyekto pa naturalesa, agrikultura i desaroyo di kunuku. Na e momentunan aki nos ta implementá proyektonan pa e plan di desaroyo di kunuku na Boneiru.

Wolfs CompanyBalotashon kuantitativo di naturalesa

Wolfs Company ta hasi un balotashon kuantitativo di nos kapital natural. Stipulashon di e balor di e kapital natural ta kontribuí na desaroyo i protekshon duradero di naturalesa i su rekursonan. Nan ta balotá e balor ekonómiko di e sistemanan ekológiko di Boneiru riba tera i den laman na 105 mion dòler pa aña.

Bonaire Agri & Aqua Business

Bonaire Agri & Aqua Business B.V. ta spesialisá den maneho di proyekto den sektor di agrikultura. Banda di esei e empresa ta duna konseho riba tereno di téknikanan di kultivo i nan ta organisá tayer pa kunukeronan lokal. Tambe e empresa ta duna guia riba tereno di maneho (finansiero) i problemanan operashonal na empresarionan ku ta kuminsá.

Foundation Echo (Fundashon Echo)Protekshon di lora na Boneiru

Fundashon Echo ta protehá e lora ‘Amazona Bardadensis’ na Boneiru. Esaki nan ta hasi pa medio di maneho di naturalesa, enbolbimentu di e poblashon lokal i investigashon.

Coral Restoration Foundation BonaireRestorashon di koral na Boneiru

E ‘Coral Restoration Foundation’ (Fundashon pa Restorashon di Koral) ta protehá i rekuperá koral na Boneiru. E fundashon ta hasi esfuerso pa rekuperá e populashonnan di e koralnan ‘acropora cervicornis’ (hertshoornkoraal – slaghorn coral) i ‘acropora palmata’ (elandgeweikoraal) den laman plat di Boneiru i Klein Bonaire. E próksimo añanan e fundashon lo planta 3200 ‘acropora cervicornis’ riba 600 meter kuadrá di e ref den laman plat dilanti di kosta di Kralendijk.

Wildconscience

‘Wildconscience’ ta sostené gobièrnunan i organisashonnan no-gubernamental pa protekshon di naturalesa ku e konosementu ambiental i e téknikanan edukativo mas resien.